Assalamualaikum warahmatullahi Wabarakatuh
Alhamdulillah marema hita panjatkon tu Allah SWT namadung mangalehen Kesehatan songoni juo kesempatan sahinggo hita dapot marsinayang langka tu bagason di borngin ni arion. Songoni juo sholawat dohot salam marima hita sanjung tinggion tu pangkuan Nabi besar kita Muhammad SAW harana syafaat ni beliau na sangat hita haropkon di hari pangabisan sangan digan.
Santabi sapulu sapulu noli marsantabi maradopkon mora markaha maranggi songoni juo maranak boru, natoras natobang ja nadi patobang, songoni juo tu harajaan songoni juo tu haguruon. Umumna hitaon sasudena nahadir di bagas namartuanon. Ijia naron adong hata niba na urang tama sangape na urang tupa sangape naso topek di jejeranna harop do au di moofkon ulang nian jadi parsangkutan di hitaon sasudena.
Olo mada mora nami jiama soro hata nami jiantong di ari natuarion rodo anak boru muyu manekteki pintu ni koum muyu anso marsinayang langka tu bagas muyu ima di bornginon. Mudah-mudahan nian satombal naso marhalangan madung do dapot hadir ima di bagason.
Imada nangkin adong burangir nadi pataya-taya ni anak boru nami, onpeda mora nami na marsapa ma amion salaos marguru. Sanga pade ma ami surdu burangir nami maradopkon mora nami harana baen nadong mada hata sidokonon nami songoni nagiot patu jolohon nami?…
Usudahi dohot salam Assalamualaikum Warahmatullahi Wabarakatuh
— Jawaban —
Olo tutu mada anak boru nami diama dalan-dalanna so marlagut hita di ari sabornginon, rodo anak boru nami manekteki pintu ni koum nami buat marsinayang langka tu bagason di bornginon. Imada nangkin adong burangir nadi pataya-taya ni anak boru muyu salaos marsapa hamu sanga pade amu manyurdu harana adong hata nagiot patujolohon muyu.
Anggo ning roangkuda anak boru nami, surdu amu ma dohot hataon kamuma aha nadi maksud muyu sorap ita boto aha tujuan na tujuan ni anak boru nami harana madi sondo sude koum muyu mora, kahanggi, anak boru, songoni hatobangon dohot haguruan. Hata namion hata namanarimo maon burangir ni anak boru nami di son hami sambut dohot tomu dot godang ni roha.
Wabillahi taufik walhidayah
Assalamualikum warahmatullahi wabarakatuh
Penulis : Abdul Aziz Rangkuti