Mora nami songoni mora ni mora na ami topotkon di bagas namartuanon dison adong maksud dot tujuan nami. Ami marguru salaos marsapa padema roai ami surdu burangir namion anso adongmada oncotkonon ni hata nami?…
Jawab : Pade surdu amu ma dok komuma hatanai
Mora nami lalu ma roai burangir namion?…
Jawab : Lalu mei.
Assalamualaikum Warhmatullahi Wabarokatuh
Muqaddimah…
Sholawat…
Santabi Sapulu…
Aloda tutu jiama hata nami surdu burangir nada lain ima taringot di anak nami nadung godang ginjang pamatangna na marpikir ma di bagasan ni roana nangkan mamolus paradatan matobang. Manjalaki rongkap ni tondi dongan markaya marugari. Di ari natuari di jamitahon ibana tu ami selaku orang tuana bahaso ibana nagiot manjalaki dongan saparadatan saparugarian. Di sintong ami sambut na tutu ja natama madai amang harana pamatangmu pentong madung magodang songoni ami pentong dot umakmu madung matobang na pade mada ho amang mamolus paradatan matobang ning kami orang tuana, tinggal tong ami jamitohon tu anak nami, pala mamolus paradatan matobang ko amang ulang kontong lupa mangaranga di bona buluntaon ima nadi jae dot di julu, di bona buluntaon pe ima nadi jae dot julu, di bona buluntaon pe bahatdo dison sendal ni moranta pambuatan dohot pangalehenan di jae dot di julu ning kami. Imada di ari natuari mangarangado anak nami tujae dot tujulu, Lalu ibana tu banjar jae dompak muse di bangku sikola, mangaranga ibana tu banjar julu topek muse na sambitan nada tartohon si sianggian nada tarpili nadi tumpuk.
Sian imada sodi langkaon ibana pat simanjajakna di ayunkon ibana tangan simangidona ima marlao-lao tujae dot tujulu. Sampe bolkas ibana ima tu bona bulu (sebutkan nama desa) dung lalu ibana tu bona bulu (sebutkan nama desa). Jiantong adong rura disi adong mali-mali ijia adong huta di adong anak ni kahanggi ning roa ni ibana. Di topotna mada anak ni kahanggion sabayana, salaos marsapa sanga adong jagar-jagar ni morana nadi parorot-rorotna satontang parrohana, ro alus ni anak ni kahanggi, anggo na uparorot-rorot satontang parrohana ngada adong tinggal tinggal rangarna tu jae dot tu julu selain sendal ni bagastaon sendal ni moranta maon na pambuatan maon dohot pangalehenan ning anak ni kahanggina. Rupana langa marlao-lao ma anak nami tu jae dot tujulu, tarpaidama diibana nadi solom ni matana na tumpuk tupa di pangarohaina ima jagar-jagar ni mora nami na sian bagason. Di palehen ibana hata humasa hata domu-domu, mardomu mada hata ni daganak nadua tinggal songonima rupa alus ni gadis ni mora nami na sian bagason (o… lak-lak ni andorung sarige-rige ni ampang, o… anak namboru nangkan babirin damang) sungguh mardomu pe hatanta anggo ngada hata ni amang dohot inang nada tarlangkai au bondul na opat.
Jadi onpeda marsi mulak muli maho jolo ceritaon tu amanta dohot inanta aupe so ujamitohon tu amanta dohot inanta di bagason ning gadis ni mora. Imada so marsimulak muli anak nami ima tu tap-tap bulu ima tu bagas nami. Satolap ni ibana tu bagas nami marjamita ibana bahaso na adong tarsangkut hata ni ibana ima di bona bulu (nama desa). Pabege-bege ida ami marlomo dohot godang ni roa disi ami martahi dot marpokat tutu sai pokat nami jia nangkatna jia ultop na jia hajatna nangkan na obar-kobaron maon nadi dokna. Angkon na sadioma itaon kehe ima tu ………. dalan manyuruk sendal ni moranta salaos marsapa sanga na tutu na petodo hata ni daganak nadua on sanga na gonjak sianyang do imada di bagasan pamikiran nami imada mora nami anso ro ami di manyogot ni arion lengkap markahanggi mar anak boru na marguru maon salaos marsapa ami sanga natutu na petodo hata ni daganak nadua sanga na gonjak sianyang do.
Muda natutu na petodo hata ni daganak nadua mangido mada ami anso dipatulus ja di pabulus hajat ni daganak nadua. Songonima hatana usudahi dot salam.
Assalamualaikum Warahmatullahi Wabarakatuh
Penulis : Abdul Aziz Rangkuti