Assalamualaikum Warohmatullohi Wabarokatuh
Allahumma sholli ala sayyidina muhammad wa ala ali sayyidina muhammad
Santabi sapulu sapulu noli marsantabi tu adopan ni mora ja na kahanggi, songoni juo tu barisan ni anak boru. Inda lupa muse hami nian patidaon bontar ni ate-ate dohot jop ni roha tu ita sasudena na rap lagut di pantar bolak na datar on.
Bukando tano naso manarimo tai tanamando naso ra tubu, bukando ami naurang usaho tai panyakitdo nasora sembuh. Muda aek di toru ni padang na manjalaki rura mai pardomuan. Muda madung katontuan na sian Tuhan nadung solompe malua doi sian tangan. Nadong naso calongon nasi-nasi di Sibuhuan, nadong nasotarimoon anggo madung takdir nasian Tuhan. Antong andilo na joloi adong kadangan mei sannari parjanjian na joloi tarimoon ni badan mai sannari.
Songoni mada di ari natuari roma udan naso hasaongan songoni angin naso hadingdingan na mangobankon ma getap putus tali ni layang-layang mas sur-sur tano si degean ma sopak dangka si tiopan matalpok batang di harapotan muda atia langit nagiot marot-rot nada tartungkol dohot jari-jari muda atia panyakit dohot ajal naro mangompot nada tardokon incogot mada sugari. Disi marlaku mada taaluk dohot takdir ni Tuhanta ibanada menghembuskan napas na terakhir mulak mada ibana tu Tuhanta dohot ucapan Innalillahi Wa Inna Ilaihi Rojiun.
Disi nada lupa ami on pabotohonna tu Kahanggi, anak boru, songoni jiran tetangga, songoni tu Kepala Desa, songoni juo tu koum nadi jae dohot di julu bahaso ami madung aurahan. Satorusna mangido ami hata poketna anso tarpabuat kita Almarhumon dohot tarlaksanaon kita pardu kifayahna. Satorusna nada lupa amion manyuru daganak na ipas langka na dua sadalanan pabotohonna tu koum nami na adong di luar hutantaon. Songoni ami pabotohonna melalui mikrofon nadi masojid tan buat pabotohonna di kampung taon.
Mudah-mudahan nian satombal naso marhalangan madung dapotdo manopotkon kami tu bagasan salaos mandokon hata sobar-sobar tandona nadohot marduka cita dohot kami hami bahat mangucapkon tarimo kasih.
Assalamualaikum Warohmatullohi Wabarokatuh
Penulis : Abdul Aziz Rangkuti